किन…?
मदन दुलाल
पेन्सिल्भिन्या, अमेरिका
किन…..?
आन्द्रामा पहिरो जान्छ
भुँईमान्छेहरूको
कति उष्णता बाफ बनेर उडिसक्दा पनि
कति खहरे नौ-नाडीमा बगिसक्दा पनि
यी भुँईमान्छेहरू
प्रत्येक पल्ट
अन्धकारमा रम्नु पर्ने
किन…..?
किन….?
सधैँ
सूर्य प्रकाण्ड प्रलाप गाउँछ
निरीह तारा/ग्रहादीमाथि
तारा/ग्रहादीहरूको
निर्मम बलात्कार भइरहँदा
गान्धारी पट्टी
बाँधी रहन्छ ईश्वर
किन?
किन….?
जुनको रश्मि उतार्न हिँडेका
सोचहरूमाथि
जिन्दगी जोहो गर्न हिँडेका
पाखुराहरूमाथि
र
सुनौलो बिहान खोज्न लम्किएका
जुनकिरीहरूमाथि
उल्का बर्सिन्छ हँ
किन ….?
दु:खछन् राम्राहरू नै
किन…?
प्रेमीहरू प्रत्येक रात
सम्मोहीत पुतलीहरू झैँ
आफ्नै सपनाहरूको मलामी जान्छन्
दम्भित वंश पिण्ड
स्नेह उत्सर्जन गर्न उद्धत छ
किन…?
सबै ….. सबै
पतन उन्मुख छन्
तर
किन……?
किन…किन …. र किन?
समय अखण्ड अलाप गाइरहेछ।