त्यहाँ के हुँदैन
-गंगा अधिकारी (लामिटारे)-ओहायो
त्यहाँ के हुँदैन ?
बन्दूक पड्केपछि रमाउछ शान्ति
उग्रराष्ट्रवादको आगो ओकलेपछि
बग्छ, राष्ट्रियखुशियालीको हुन्डरी
चाबुक हानेपछि
लुरू लुरू हिँड्छ वायु पनि !
ब्यारेकमा बुट्बजे पछि
गाउँमा चर्किन्छ, कोलाहाल,
हाहाकार र चित्कार ,
त्यहाँ के हुँदैन ?
चावासुमको पुल्ठो झोसेपछि
मौनतामा डुब्छ मानवता
सयपत्रीमाथि निर्दयी बुट बजारेपछि
जल्छन,संस्कृति र स्वाभिमानहरू
त्यहाँ के हुँदैन ?
सत्ताले क्रूरता उगेलेपछि
त्यहाँ मचिन्छ,हिंसाको ज्वरभाटा
शान्तिको टाउकोमा बम बर्षाएपछि
रक्ताम्य बग्छन्, नदीनालाहरू
जनताको रगतमा होली खेलेपछि
निर्जन बन्छन्,गाउँ, बस्ती र शहरहरू!
वासनाका ओठवाट विषालु ह्राल झरेपछि
लुटिन्छन्,दिनदाहडै निर्माया र लछीहरू
जताततै सुनिन्छ,बलात्कारका चित्कारहरू !
निर्भय डुल्छन्,मानवताका भक्षकहरू !!
त्यहाँ के हुँदैन ?
सिंहासनको गर्जन सुनेपछि
हुन्छ, दानवताको महोत्सव
हुन्छ,मानवताको चिरहरण
हुन्छ, चिच्याहट,हत्या र हिंसाहरू ।