शुभेच्छा
मधु घिमिरे
वस्टर,मासाचुसेट्स,अमेरिका
पहाडका मधेशका हिमालका मनुष्यमा
सुशान्ति कान्ति फैलियोस् हटेर रोग विश्वमा
जताततै प्रमोदले गरेर राज्य मस्किँदा
म छन्दमा सुसिर्जना गरी गरी रमाउँला
तलाउ शैल गाउँमा र कन्दरा कुना कुना
जपेर मन्त्र शान्तिको गरेर नित्य वन्दना
टिपेर फूल बाबरी रमाउँदै चढाउँला
म छन्दमा सुसिर्जना गरी गरी रमाउँला
अनेकता भयो भने सदैव खोज एकता
सधैँ सधैँ धरा भरी रहोस् रहोस् सुसभ्यता
विभेद भेदका जरा उखेलिएर फालिँदा
म छन्दमा सुसिर्जना गरी गरी रमाउँला
सदैव भाइ भाइमा सुभाव होस् धराभरि
सदैव देश देशको मिलाप होस् धराभरि
समानता र शिष्टता रहून् सदा परम्परा
म छन्दमा सुसिर्जना गरी गरी रमाउँला
पवित्रता र प्रेमको विकास होस् बराबर
परोपकार सिर्जना अझै फुलून् निरन्तर
विवेक बुद्धि साधना समेटिएर फैलिदा
म छन्दमा सुसिर्जना गरी गरी रमाउँला
पञ्चचामर छन्द