उनको स्मृतिमा-म पात्र
शून्यातामा हराएको
अनौठो म पात्र
तिम्रा सम्झना सम्झनाहरु माझ
मेरा अनेकौँ खुशी
आँखाभरी अतीत
याद र अविरल कल्पनाहरु
मेरो मनले खिचेको तिम्रो चित्र
जिवित अनि अमर छ !
अनिश्चित भविष्य,
मिठो सपना र परिवर्तित
संसारको रङ्गिन यात्रामा
कौतूहल, उमङ्ग र उत्साहा
बीच बीचमा निराशाका रेसाहरु
थोरै खुशी,
दु:खका पहाडहरु
संघर्षको झोली बोकेर
भौतारिँदो यो पात्र !
बाध्यताहरु बीच
आफू–आफूमा अलगिनुको
छुट्टै वास्तविकता छ
थोरै खुशीमा पनि तिम्रै सम्झना
मन मस्तिकमा पुरानै स्मृति
सदा गौरव छ तिम्रै!
संसारका हरेक कुनामा
अपरिचित वातावरणका
कठीन परिस्थितिहरु बीच
रुमलिदै छु म पात्र
सबैतिर बेगिएका यी पाइलाहरु,
एसिया, अमेरिका,अष्ट्रेलिया
अनि यूरोपका प्रत्येक कुना कुनामा
तिम्रै गौरव बाँचिरहेछ !
पृथ्वीको आफ्नै रफ्तार छ
निरन्तर चलिरहन्छ
सिसा नचर्किदो कहाँ हो र?
भविष्य नचर्किएको कहाँ छ र?
जिन्दगी आरोह अवरोहबीच
आँफैमा परिचालित छ
तिता मिठा भोगाइहरु बीच
अपरिचित परिस्थिति अनि
कठिनाइहरु बीच
आँफैमा प्रश्न चिन्ह
म पात्र !