एउटा जून ओर्लंदै छ
(गीत)
सुविसुधा आचार्य; मेरिल्याण्ड-अमेरिका
एउटा जून ओर्लंदै छ, खेल्नलाई मेरो काखमा ।
सुख दुःख जति छन्, झेल्नलाई साथ साथमा ।।
बादल स्वयं हट्नेछ, पन्छाउँदै सबै बाटो ।
मुस्कुराउँछ उसलाई देख्दा, धर्तीको सुन्दर माटो ।।
फूल गाउँछ सूर तालमा, नाच्छन् आकाशका तारा ।
आँखै नझिम्काइ हेर्या, हेर्यै हुन्छ दुनियाँ सारा ।।
इन्द्रेणीको पगरी त्यो, सजाएर आफ्नो माथमा ।
एउटा जून ओर्लंदै छ, खेल्नलाई मेरो काखमा ।।
बेचैन भाछु प्रतिक्षामा, कुर्दै उसको आगमनलाई ।
थामी रै’छु जसोतसो, बढ्न खोज्ने धड्कनलाई ।।
छुन्छ होला दिलमै मेरो, शितल उसको चमकले ।
भिज्छु होला निथाचुर्न, ममताको महकले ।।
झलमल हुन्छ पक्कै, औंसीको कालो रातमा ।
एउटा जून ओर्लंदै छ, खेल्नलाई मेरो काखमा ।।