गंगास्तुति

हे गंगे ! जब स्वर्गदेखि तिमिले आएर पृथ्वी तल ।
सारा मानिसलाई मुक्ति दिनमा गर्दै सदा तत्पर ।
तिम्रो दर्शन गर्न यात्रिजनले आएर गोता लिई ।
फिर्दामा पनि सम्झने हरबखत् मुक्तीदिने हुन् भनी ।।

राम्रो नाम छ दूर राष्ट्रहरुमा यी मातृ गंगा भनी ।
प्रातः काल उठेर स्नान गरिंदा सर्बस्व पाप् नाशने ।
जै गंगे ! भनि पूर्वजादि मुनिले तिम्रै शरण्मा परी ।
गर्थे दिव्य पुकार सुन्दर तिमी संसारकी सारथी ।।

झर्नारुप पहाडको शिखर नै सर्बत्र ढाकीकन ।
छाडी स्वर्ग झर्‍यौनि भूमितलमा देखेर पापी जन ।
धेरै ताप पर्‍यो भनी सगरमा राजा भगीरथ् सँग ।
आयौ श्री शिवका शिरोपरहुँदै भागीरथी भैकन ।।

प्यासी प्यास बुझाउँने तरहले निस्की अनेक् धाममा ।
इच्छापूर्ण गेरेर फिर्छ जनता पाएर नै शान्त्वन ।
शक्ती भारतको र देश सबको सम्झेर भित्री मन ।
सेवा खातिर धर्म राख्न नरको आयौ नदी रुपमा ।।

लज्जाको पनि ख्याल रत्ति नगरी दुर्गन्ध गर्छन् तर ।
उल्टो पाप पखाली शुद्ध गतिले बग्छ्यौ तिमी सल्सल ।
तिम्रो वेग त टुंगिदैन विचमा जान्छ्यौ तिमी सागर ।
गर्थे रे ऋषि मन्त्र सिद्ध तटमा तिम्रै लिई आदर ।।

तिम्रै नाम लिएर गर्छ जन जो यो काम गर्छू भनी ।
त्यस्लाई पनि शान्त हुन्छ दिलमा पापै गरोस्ता पनि ।
सानो काम बिचारी सिद्ध जनले हे मात मै हूँ सुत ।
भन्नेलाई सरक्क दान दिनमा हुन्छ्यौ सदा फूर्सद ।।

स्वर्गैमा पनि देवता मिलिजुली तिम्रो भजन् गर्दछन् ।
गंगा नाम सुनेर देश कतिता आनन्दमा पर्दछन् ।
देवी हौ तब दिव्य तेज बलले आएर पृथ्वीतल ।
यो नौकासरि देह पार गरनेभारी लियौ गौरव ।।

नीलो बादल रड्ड धार बिचमा धारा प्रवाहीतको ।
नौका चालक देखि बुद्धिजनले चर्चा गरी धर्मको ।
सेताहंस ढलक्क तीरतलमा शोभा भएको कति ।
आमा हुन् सरि शान्त हुन्छ मनमा यो विश्व ब्रह्माण्डको ।।

टल्कन्छन् रवि मोतिझैं किरणले मध्यान्हमा टल्टल ।
जो–जस्ता जतिमस्त छन् लहरमा स्नानादिका खातिर ।
जै–जैकार लगाई दर्शन गरी भन्छन् इ हुन् सागर ।
झट्टै पाप पखाली लोकसबको हे मात ? रक्षा गर ।।