गजल – ३८२
बैरागी माइलो
पेन्सिल्भिन्या, अमेरिका
बा रक्सी छोड्छु, पानी पिउने बानी बनाउँछु ।
खाडी कै भए पनि एउटा राहदानी बनाउँछु ।।
देश बेचिसके भ्रष्ट र घुसखोर नेता भनाउँदाले।
बेच्न बाकी रहेको सगरमाथालाई सिरानी बनाउँछु ।।
सारङ्गी मादल बिनायो र मुर्चुगा गाउँमा रुँदै छन् ।
यिनै बाजा बजाएर यो मुलुकको निशानी बनाउँछु ।।
शत्रुलाई पनि माया गर्न जानेका वीरहरूको देश हो यो ।
तिनै वीर सपुतहरुको बिर्सनै नसक्ने कहानी बनाउँछु ।।
मेरो छोराका अनगिन्ती सपनाहरू पुरा हुन्छन् या हुँदैनन् ??
भन्ने गर्छ ‘धेरै पढेर मूर्ख भएकालाई फेरि ज्ञानी बनाउँछु’ ।।