गजल ५४२
अबिलाल राई
बेलडाँगी, दमक तिन
जाडो छल्ने न्यानो नाना छैन हजुर
भोक लाग्दा पेटभरि खाना छैन हजुर ।
वर्षा याममा झरीले रात दिन रुझाउँछ
ओत लाग्ने राम्रो छाना छैन हजुर ।
इष्टमित्र आफन्त परिवार सबै टाढिए
बिछोडको गीत गाउने गाना छैन हजुर ।
शिक्षा स्वास्थ्य सबै राहत कटौती गरिदिए
हाम्रो निम्ति बोलिदिने राना छैन हजुर ।
नक्कली शरणार्थी काण्डले झनै मन रुवायो
अपराधीलाई सजाय दिने ठाना छैन हजुर ।।