झिँगो
Pennsylvania, America
Bhakta Ghimire is one of the editors of Bhutaneseliterature.com.
भक्त घिमिरे
पेन्सिल्भिन्या, अमेरिका 
“बस्न गो महमा माखो, महमै प्वाँख टाँसियो,
प्राण गो लोभले गर्दा, लोभ गर्नु नजाती हो !”
खाटमै ढल्किएर बच्चा बेलामा पढेको
कविता पङ्क्ति दोहोऱ्याइरहेको थिएँ-
अनायासै झ्यालको सिसामा ठोकियो,
ऱ्याइँ ऱ्याइँ गरिकन फेरि ढोकामा बजारियो,
मेरो निधारमा ठोक्किँदै बतासियो र भाँडोमा पुग्यो;
म आफ्नै धूनमा थिएँ, मेरो नाकमा आइपुग्यो-
मलाई थाहा छैन यो झिँगो कोठामा कसरी पस्यो !
उड्दै थियो, उडिरहेकै थियो;
हिजो बा’ले प्रयोग गरेपछि
पखाल्नै नभ्याएर त्यतिकै राखेको;
बिरामी बा’ को चुठुवा कोठामै थियो,
हुर्रिएर गएको त्यो झिँगो त्यही चुठुवामा पस्यो ।
त्यो मरेको म हेर्न चान्न थें,
एउटा सिन्काले जतनसाथ झिकिदिएँ !
कोठामा कीटाणुहरूको प्रवेश रोक्न
प्रशस्तै सुगन्धी अत्तरहरू छर्किएकै हो;
पकवानको वाफमा फेरि त्यही झिँगो लोभिएछ;
कहाँबाट सुइँको पायो कुन्नि-
अर्को दिन, भान्सा कोठाको भ्याण्टिलेशनबाट
बाटो पाएछ क्यार-सुटुक्क छिरेर
सारा परिवारको खाने कुरामाथि उभिँदै-
त्यसका दोब्रिएका घुँडा उध्याइरहेको थ्यो !
मार्न मनै थिएन, रुमालले हम्काइदिएँ,
उडान मोडेर फेरि गाग्रीमा बस्यो,
पछिल्तिरका खुट्टा उचालेर
बेस्सरी घुँडा रगड्तै
ल्होटाको बिटमाथि घुम्दै रह्यो ।
कुचो हल्लाएर
त्यहाँबाट पनि धपाउन खोजेँ,
यस पटक भुइयाँ उडेर गयो र,
दलिन छेउको गमलाको फूलमाथि बस्यो !
मार्न मनै थिएन त्यसलाई-
तर, फुल्नै लागेको फूलबारीमा,
फूलका कोपिलाहरुमा,
भर्खरै फक्रिँदै आएका थुँगाहरुमा,
हाम्रो साझा फूलबारीमा,
त्यो प्रवेश गर्दा-
दुर्गन्धित चर्पीहरुमा डुबेर
त्यसले ल्याएको दुर्गन्ध,
सारा बगैँचामै फैलाइदेला;
पक्कै पनि त्यसले
भविष्यको सुगन्ध दिने
ती फूलका थुँगाहरूमा औंशा पार्ला,
आफ्नो फोहोरी साम्राज्य फैलाउन
बथानका बथान बच्चा हुर्काउला भनेर;
मन नपरी नपरी जहर छर्न बाध्य भएँ …!