निर्माणाधीन मन
ईशोर ढकाल
नर्थ क्यारोलाईना, अमेरिका
जिउँने सङ्घर्षमा
भयानक हुरिबताससङ्ग
बिजुली चम्किदै मेघ गर्जिरहेको बेला
कानै चिरिने गरी चर्को बज्रको आवाजमा
झस्किएर दिउँसै रातको निरवतामा
बतासिन्छ बिचरा
यो मन ।
कहाँ पुग्छ वा पुग्दैन
कुनै विन्दु वा परिधि छैन
कताबाट आहाराको वासना आउँदै छ
केही चाल पाउँन सम्म सक्दैन ।
आफ्नो बास उठेका
पिडाको भारी बोकेर
मस्तिष्कमा आफ्नो परिवेश्
परिवारबाट छुट्टिनुको बेग्लेइ
तितो अप्रत्यशित सोचहरू बटुलेर
कसैको आँगन र सँघारमा
टेक्ने हिम्मत गर्दैन ।
बेगिएर सगरमाथामै
ठोकियो भनेत ठिकै हो,
माउन्ट हर्मोन र माउन्ट केटुमा ठोक्किन पुग्यो भने ?
सुनकोस, मानस र कोसीमा बहँदा
स्वर्गको अनुभूति होला ।
शार्कहरु भोकले यत्रतत्र मुख बाउँदै पौडी रहँदा
ठुलो महासागरमा पर्यो भने ?
मानिसले मानिसलाई काटेर बगेको रगतको
दहमा पर्यो भने
अस्तित्वको पाठ कसले सिकाउँछ ?
कल्पनै गर्न नसकिने
मुक्तिको खोजीमा
बिचरा !
यो मन ।
अनगन्ति अप्ठ्याराहरूको पर्खाल
छिचोल्दै आफ्नो रहरहरू पुरा गर्न
सपनाको भारी ओसार्दै छ
हरेक रात ।