सफल मान्छे
मधु घिमिरे
वस्टर, मासाचुसेट्स्
छन्द :- भूजङ्गप्रयात
छ बानी र वाणी लिएको वसैमा
उहीं पुग्छ मान्छे सधैं टाकुरामा
अरुको कुरा यो छ सुन्ने त कम्ती
उही गर्छ सेवा छ आफै नि शान्ति ।।१।।
छ उस्को त आचार आलोक ठुलो
उसैले बनायो धरा यो उज्यालो
न ऊ प्याच्च बोल्यो गर्यो नित्य काम
सबैको पियारो उही हो महान ।।२।।
छ ऊ स्वावलम्बी भयो जीत उस्को
पुर्याएन हानी कहिल्यै कसैको
न ऊ त्रास चिन्ता न अन्योलमा छ
डराएन कहिल्यै न ऊ हार मान्छ ।।३।।
चढायो उकालो यही जिन्दगानी
गर्यो कष्ट सारा सही घाम पानी
सबैको छ उत्प्रेरणाको मुहान
सधैं सुन्नु उस्को कुराको बयान ।।४।।