कथा वाचन प्रतियोगिता हुँदै
पेन्सिलभेनियामा “सङ्गालो: रिडिङ फर रिजिलियन्स” कथा वाचन प्रतियोगिता आयोजनामा
क्रियमाण नामक गैर-नाफामूलक संस्था पेन्सिलभेनियामा पुनर्वासित भुटानी शरणार्थी समुदायको सशक्तीकरणमा समर्पित छ। यो संस्थाले सांस्कृतिक सम्पदालाई जगेर्ना गर्दै, सामाजिक लगाव र मानसिक स्वास्थ्य समस्याहरूलाई सम्बोधन गर्ने उद्देश्य राखेको छ। सामाजिक रूपमा एकीकृत र संवेदनशील तरिकाहरू अपनाएर, यसले जनचेतना जगाउँदै समुदायलाई एकीकृत गर्न प्रयासरत छ।
७ सेप्टेम्बर, २०२४ मा ह्यारिसबर्ग, पेन्सिलभेनियामा “सङ्गालो: रिडिङ फर रिजिलियन्स” नामक कथा वाचन प्रतियोगिता आयोजना हुँदै छ। प्रतियोगिता बिहान ११ बजे सुरु हुनेछ। यो विशेष कार्यक्रमले भुटानी शरणार्थी समुदायलाई मानसिक स्वास्थ्य समस्याहरूबाट निको हुने यात्रामा एक महत्त्वपूर्ण योगदान पुर्याउनेछ।
प्रतियोगितामा भाग लिन सबै भुटानी युवाहरू योग्य छन्, र भाग लिने प्रतियोगीहरूले नेपाली भाषामा लेखिएका कथाहरू पढ्नेछन्। यद्यपि पाठकहरू युवाहरू हुनेछन्, कथाहरू सबै उमेर समूहका दर्शकहरूलाई लक्षित गरी तयार गरिएका हुनेछन्। यी कथाहरू केवल भुटानदेखि अमेरिका सम्मको यात्रा मात्र होइन, बरु हाम्रो समुदायका विशेष घटनाहरू, महत्त्वपूर्ण व्यक्तिहरू, जीवनशैली, चाडपर्व, सङ्घर्ष र बलका कथाहरू हुनेछन्। कथाहरू भावनात्मक, जानकारीमूलक, प्रेरणादायक र गहिरो रूपमा छुन सक्ने खालका हुनेछन्। यो प्रतियोगिता कुनै साधारण प्रतिस्पर्धा मात्र होइन, यो समुदायका सदस्यहरूको निको हुने प्रक्रियाको एक हिस्सा बन्नेछ।
प्रतियोगितामा उत्कृष्ट प्रस्तुति दिने प्रतियोगीहरूलाई आकर्षक पुरस्कारहरू प्रदान गरिनेछ। प्रथम पुरस्कार नगद एक हजार, दोस्रो पुरस्कार सात सय, र तेस्रो पुरस्कार पाँच सय डलर राखिएको छ।
यस कार्यक्रममा सहभागी हुने निर्णायकहरू र अतिथिहरू लामो समयदेखि भुटानी शरणार्थी समुदायको सेवामा समर्पित व्यक्तित्वहरू हुनेछन्, जसले कार्यक्रमलाई अझ विशेष बनाउनेछ।हाम्रो लक्ष्य भनेको मानिसहरूलाई मानसिक, भावनात्मक र शारीरिक रूपमा स्वस्थ्य रहनका लागि समग्र दृष्टिकोणलाई प्रवर्धन गरेर फेरि आफ्नो जीवन आफ्नै हातमा लिने क्षमता प्रदान गर्नु हो। हामीले यस्तो भविष्यको कल्पना गरेका छौँ जहाँ शरणार्थी समुदायहरू मात्र बाँच्ने होइन, समृद्ध हुन्छन्। सांस्कृतिक विविधता बल र सहनशीलताका लागि एक शक्तिशाली उत्प्रेरक बन्न सक्छ, र यस कार्यक्रमले त्यसैलाई प्रवर्धन गर्नेछ।
कथा पढ्न नेपालीमा समस्या छ भने चिन्ता नगर्नुहोस्। तपाईँले कथा अङ्ग्रेजी अक्षरमा पुनः लेखन गरेर पढ्न सक्नुहुनेछ। भाग लिन चाहनुहुन्छ भने, “मलाई कथा पढ्न मन छ” भन्ने भावना राख्नुस् र तपाईँलाई कथा कार्यक्रमको एक हप्ता अगाडि नै उपलब्ध गराइनेछ।सङ्गालो: रिडिङ फर रिजिलियन्स समुदायको निको हुने यात्रा सुरु गर्ने एउटा सांस्कृतिक रूपमा संवेदनशील कार्यक्रम हो। यो हाम्रो समुदायलाई सशक्त बनाउने र सांस्कृतिक सम्पदालाई जगेर्ना गर्ने दिशामा महत्त्वपूर्ण कदम हो।