डा. ढकालको “वासेदेखि पुनर्वाससम्म” अनलाइनमा लोकार्पित

साहित्य परिषद्,भूटानले प्रकाशित गरेको डा.लक्ष्मीनारायण ढकालको ऐतिहासिक संस्मरणात्मक कृति “वासदेखि पुनर्वाससम्म”को अनलाइन मार्फत लोकार्पण भएको छ I

कार्यक्रम पूर्व निर्धारित समय अनुरूप अमेरिकाको पूर्वी समय अनुसार मिति ५ /२३ /२०२० (शनिवार) का दिन बिहान अनलाइनमा आयोजित थियो I यद्यपि यो कार्यक्रम साहित्य परिषद् भूटानको २७ औँ स्थापना दिवसका उपलक्ष्यमा मार्च २२ का दिन कोलम्बस ओहायोमा आयोजना हुने भएको थियो तर विश्वव्यापी कोरोना भाइरस महामारीका कारण स्थलगत भेला हुन नसक्दा उक्त कृतिको अनलाइनमा विमोचन गरिएको हो I

कृतिकार ढकालका मातापिता ,सासू ससुरा ,साहित्य परिषद् भूटानका अध्यक्ष गङ्गा लामिटारे, भक्त घिमिरे,मुख्य अतिथि डेन्जोम राई लगायत ज-जसका हातमा कृति पुगेको थियो, सबैले एक साथ प्रदर्शन गरी लोकार्पण भएको थियो I कार्यक्रममा १० जना भूटानी कविहरूले आफ्ना कविता वाचन गरेका थिए I

भूटानी परिप्रेक्ष्यमा  यसरी अनलाइनमा कृतिको लोकार्पण भएको सम्भवत: यो पहिलो अवसर हो I साहित्य परिषद् भूटानका वर्तमान अध्यक्ष गङ्गा लामिटारेको सभापतित्वमा भएको यो कार्यक्रममा नेपालबाट आमन्त्रित अतिथि साहित्यकार कृष्ण धरावासी, बनारसबाट विशिष्ट अतिथि भूटानी विद्वान् डा.हरिप्रसाद अधिकारी र प्रमुख अतिथि ग्लोबल भूटानी साहित्यिक सङ्गठनका अध्यक्ष डेन्जोम राई थिए I सबै अतिथि वक्ताहरूले कृतिकार ढकालको कृति “वासदेखि पुनर्वाससम्म’को महत्त्वका बारेमा प्रकाश पारेका थिए I

विशिष्ट अतिथि कृष्ण धरावासीले भूमिका लेखेका हुनाले मैले भन्ने कुरो पुस्तकको भूमिकामा नै पढ्नुहोला भन्दै यस कृतिलाई अङ्ग्रेजीमा पनि अनुवाद गर्नु पर्ने कुरामा जोड दिए I भूटानी समस्यामा “शरणार्थी”नामका उपन्यास लेखिसकेका धरावासीले सबै पीडित भूटानीहरूसँग पर्याप्त लेखन सामग्री भएकाले यसरी नै अरूलाई पनि कलम चलाउन सुझाव दिएका छन् I डा. अधिकारीले कृतिकार ढकाल विद्यार्थी जीवनदेखि नै सकारात्मक र उत्साही रहेकाले आज यो कृति समाजलाई दिन सफल भएको बताए I मुख्य अतिथि डेन्जोम राईले भूटानी समाजमा यस कृतिले एउटा नयाँ आयाम थप्दै हाम्रो इतिहास, संस्कृति र भाषाका निम्ति महत्त्वपूर्ण भूमिका खेल्ने विश्वास व्यक्त गरे I

कृतिको समीक्षा गर्दै शिव दाहाल र भक्त घिमिरेले कृतिको विशेषता, सान्दर्भिकता र भावी लेखकका निम्ति अनुसन्धानको एउटा मार्गदर्शक कृति हुने बताए I कृतिका कमजोर पक्षहरू केलाउँदै समालोचक दाहालले लेखकलाई आफ्नो लेखनमा सुधार गर्नु पर्ने विषयहरूप्रति सजग गराए I टिप्पणीकार भक्त घिमिरेले यो कृति अहिलेसम्मको भूटानी लेखकले लेखेको सरल र नेपाली भाषामा लेखेको पहिलो कृति हो र यसले थुप्रै अनुसन्धानका सम्भावनाहरूलाई खुलाउने छ भने I

कार्यक्रममा अमेरिका, क्यानडा, नेपाल, भारत, अस्ट्रेलिया, नर्वे लगायतका देशहरूमा रहेका लगभग ५५ जना साहित्यकारहरूले भाग लिएका थिए I कृतिकार डा. ढकालले कृति लेखनका क्रममा सहयोग गर्ने सबै व्यक्तिहरू, भूमिका लेखिदिने विद्वानहरू र परिवारका सम्पूर्ण सदस्यहरू लगायत आफ्नी श्रीमती हिमा ढकालको अमूल्य योगदानको उल्लेख गर्दै आभार प्रकट गरे I

कार्यक्रमलाई साहित्य परिषद् भूटानका सचिव खेम रिजालले सञ्चालन गरेका थिए भने सल्लाहकार सदस्य संचमान राईले जूम होस्ट गरेका थिए I उता अस्ट्रेलियाबाट प्रसारण गरिने अनलाइन सुनकोश टिभीका सञ्चालक नारायण मिश्रले प्राविधिक भूमिका निभाउँदै कार्यक्रमलाई आफ्नो च्यानलबाट लाइभ प्रसारण गरेका थिए I