उल्लासमय नयाँ वर्ष

गंगाराम रिजाल
टेनिसी,अमेरिका
१
हावा चल्दछ मन्द मन्दगतिले आकाश नीलो हुँदै !
नाचे पंछी मयूर बागभरिनै छम् छम् गरि उफ्रँदै॥
गर्छन् सुन्दर भावले नयनका संकेतमा स्वागत।
आयो वर्षनयाँ गरौँ सबमिली उद्योग नै हिम्मत॥
२
मीठो तान भरेर कोयली कुहू गर्दै सुनिन्छन् वन ।
भाका न्याउलको अथाह गहिरो पग्लिगयो झन् मन॥
हिँड्छन् लस्कर साथमा मृगहरू नाचे मयूरै पनि ॥
लेखौँ के प्रकृति मसक्दिन सबै छन् धन्य धेरैअनि ॥
३
मौरी भुन् भुन बागमा पुतलीले पंखा चलाईघुमे।
छानी छानी पिए सबै महजति त्यो फूललाई चुमे ।।
गाउँ खेतभरी किसान सबका बालीनिकै सप्रिने !
देख्छु मस्त सबै उमंगमयले सौभाग्यले भर्दिने ॥
४
पंछी भुर्र उडेर माथि रूखमा आफ्नै बनाए घर ।
अर्कालेपनि प्वाल पार्छ विचरो सानैछ केहो थर॥
पत्ता घाँस दुवो टिपेर खिरिला पारे गुँडै सुन्दर।
आशानै दरिलो रहेछ पृथिवी नौला बनिन्छन् घर !!
५
खेती गर्न किसान हर्षमनमा रोपेर बालीहरू ।
गर्दैछन् सबउद्यमी नगरका गाउँघरैका अरू ॥
अग्लायुग्म विशाल राजभवन निर्माणमा तल्लिन ।
लागे जुट्नसबै ती उद्यमीहरू सन्देश राम्रो दिन॥
६
पारिजात र बाबरी मखमली बेली चमेली कतै॥
फुल्छन् बोटभरी सुगन्धमयका रङ्गी बिरङ्गी सबै॥
फक्रिन्छन् सयपत्रि हाँसीबहुतै यो धर्तीमा स्वागत।
गर्छन् दिब्य वशन्तमा मनभरी यो धर्तीको इज्जत॥
७
नेपालीहरूको वशन्त ऋतुयो वैशाख नौलोबनी ।
आयो है सपना सजाई मनमा केहुन्छ होला भनी॥
सारा विश्वभरी दिदी र बहिनी छन् दाजुभाई सब।
संझिन्छन् जब हर्षले हृदयमा फिर्दा वशन्तै जब॥
८
लेखेँ गद्गदभै यिनै प्रकृतिका यात्रा सुनौला दिन।
उर्लियो खहरेसरि मकनता संवेगले यो किन॥
देखेँ झट्ट अगाडी कल्कल नदी त्योरङ्ग नीलो सफा।
सारा विश्वभरी रमाउन सकुन् हाँसीखुसी सर्वदा॥

छन्दः- शार्दूलविक्रिडित