आइदेऊ
भावना गिरी
क्यानाडा
मेरो दिलको चाह बुझेर आइदेऊ
दिल भिज्यो तिम्रो रे ? लौन रुझेर आइदेऊ I
गुनिऊ चोलीमा पटुकी बानेर आइदेऊ
ए लाटी चौबन्दीको तुना चैँ तानेर आइदेऊ I
शृङ्गारको नाममा मुस्कान पोतेर आइदेऊ
बाको मन बुझाई हलो चैँ जोतेर आइदेऊ I
अबेर होला फर्कन राँको तिमी बोकेर आइदेऊ
प्रेमको कुरा गरौँ हतारिने मनलाई रोकेर आइदेऊ I
चाहको कुरा प्रिय दिलमा कोरेर आइदेऊ
गुम्सिएको भावनाको खुत्रुके फोरेर आइदेऊ I