गजल – ४०२
विशु निछा
अस्ट्रेलिया
गाली गर या गीत बनाऊ, जिन्दगी तिम्रै हातमा छ
काँडामा फाल या फूलले सजाऊ,जिन्दगी तिम्रै हातमा छ ।
हिँडिरहे शिखर पुगिन्छ, बसे लेउ लाग्ने नै हो
बसाईराख या अगाडि बढाऊ, जिन्दगी तिम्रै हातमा छ ।
देखिन्न सुन्दरता रातमा, सिर्जन्छ सौन्दर्य दिनले
उज्यालो भर या अँध्यारो खन्याऊ जिन्दगी तिम्रै हातमा छ ।
बीउ एउटा रोपेर कहिले, बोट अर्को उम्रिने होइन
जंगल उमार या गुलाफ फुलाऊ,जिन्दगी तिम्रै हातमा छ ।
खाल्डोमा पर्ने पुरिन्छ, देखिन्छ उक्लिए डिलमा
तल झार या माथि उठाऊ, जिन्दगी तिम्रै हातमा छ ।