गजल-४३१ (सवाल-जवाफ)
माया भट्टराई
केन्टकी, अमेरिका
(दुर्गाप्रसाद रिमालको सवाल र माया भट्टराईको जवाफ गजलका शेरहरुमा ।)
सवाल
राख्न नमिल्ने भो दुवैलाई अनि गल्ती भयो
आमाकै स्थान माग्यौ तिमीलेपनि, गल्ती भयो ।
तपाईँको बस्ती टेकेर पर्देशिए, माफ पाऊँ
सम्झनु भएकै’थ्यो आफन्त र’नि गल्ती भयो ।
चिन्नु पर्थ्यो परिवार सुरुमा चिन्न सकिएन
आज आयो आफ्नै दुश्मन बनी, गल्ती भयो ।
भुटानी हुँदै नेपाली अनि अष्ट्रेलियन बनियो
लेख्नेले नमिलाई लेख्यो जीवनी, गल्ती भयो ।
बस्नु पर्थ्यो जमिनमा सबैले स्पर्श गर्ने थिए
बस्नु थियो आकाशमा ए चाँदनी, गल्ती भयो ।
(—दुर्गाप्रसाद रिमाल, अल्बेरी अस्ट्रेलिया)
जवाफ
सँगै अटाएर दुवैलाई राख्न सके गल्ती हुँदैन
‘यो माया हो’ जति धेरै बाँड्न सके गल्ती हुँदैन ।
तिम्रो बाध्यता हो, रहरमा कसैले देश लुटाउँदैन
‘नेपाली जाती हौँ हामी’, जान्न सके गल्ती हुँदैन ।
जीवन सुन्दर बनाऊ आफ्नाहरूको अहम्ता झर्नेछ
अनि परिवारलाई मिलाएर बाँच्न सके गल्ती हुँदैन ।
देश नहुनु एउटा दुर्भाग्य, धेरै देश हुनु अर्को भाग्य
तिनै देशलाई छातीमा टाँस्न सके गल्ती हुँदैन ।
अरू जाँ/जाँ पुगुन्, तिमी धर्तीमै बस, धर्तीमै बाँच
सबैको मायामा रुन सके, हाँस्न सके गल्ती हुँदैन ।
(–माया भट्टराई, केन्टुकी अमेरिका)