गजल-४५५
–धर्मेन्द्र तिम्सिना “क्षितिज” / ओहायो, अमेरिका
मुखमा रामराम छुरा बगलीमा छ
संसार बदल्ने ताकत मसीमा छ ।
राम्रो छ नराम्रो छ बुझी नसक्नु छ
लाग्छ यो संसार कसैको मुट्ठीमा छ ।
सबै धेरै चाहन्छन् सबै पुरा चाहन्छन्
भन्नुस् कसको चाहिँ नजर आदिमा छ !
तिमी पनि जान्छौ मैले पनि जानुपर्छ
जिन्दगी कुनै हदसम्मको अवधिमा छ ।
गरिब यसै खुसी छन्, थोरैमा रमाउँछन्
अझ सम्पत्ति थुपार्ने लालच धनीमा छ ।
सबैतिर आफ्नै स्वार्थको कुरा हुन्छ
निस्वार्थ माया आमाको छातीमा छ ।