तुलनात्मक संदेश
मधु घिमिरे
मासाचुसेट ,यू एस ए
जस्तै कष्ट र पीडामा हुँदैन आतिनू कति
वृक्षको हेर जाडोमा झर्छन् पात भए जति ।
सानो यो कमिलो हिँड्दै टाकुरो छुन पुग्दछ
लगातार गरे कार्य सफलता छ सुनिश्चय ।
सानो चीज भनी कैलै हेला नगर्नु बेस छ
सानो त्यो चक्षुको नानी विश्व देख्न सगाउँछ ।
आफ्ना भाका र भाषाले सिकाउँछन् रमाउँन
नभमा काग खुल्ला छ सुगा पाएन उम्कन ।
सारालाई खुसी पार्न कहिल्यै छैन सम्भव
दियालो मुनि थोरै नै सदैव अन्धकार छ ।I