सम्भावनालाई याचिका
भरत तिम्सिना
अमेरिका
म खनूँ मेरो बाटो
बनूँ जो हुनु छ
मेरो शान, स्वाभिमानमा
विनम्रता टल्कियोस्
मन नपरूँ सबैलाई
यस्तो शत्रु बनूँ कसैको
मेरो शत्रुतामा पनि
भद्रता भइदियोस्
म उडूँ हावामा,
तारा खेलाऊँ हत्केलामा
मेरो प्रसन्नतामा
गम्भीरता झल्कियोस्
म उर्लिऊँ ,
चुल्लिऊँ खहरे झैँ
चुनौती दिऊँ साँगुरा बाँधहरूलाई
मेरो आँट, आडम्बरमा
शिष्टता छल्कियोस्
म लालची बनूँ
बटुलूँ जति जे छ जम्मै
मेरो जिज्ञासा र उत्सुकतामा
रिक्तता रहिदियोस्