गजल-४५७
धर्मेन्द्र तिम्सिना “क्षितिज”
ओहायो, अमेरिका
कसैलाई चाड कसैलाई फसाद हो दसैँ
पीडा अनि खुसी मिश्रित उन्माद हो दसैँ ।
बलियाले निर्बललाई दबाइरहने प्रथाभित्र
मैसासुरहरुको गुन्जिने आर्तनाद हो दसैँ ।
घरमा पिठो छैन, ॠणैॠणले थिचेको छ
धनीलाई मोज गरिबलाई बरबाद हो दसैँ ।
बाध्यताले परदेशमा छ, रुनु पर्छ धुरुधुरु
परदेशीको मुटु जलाउने याद हो दसैँ ।
भोलि होस या नहोस् आज मस्ती गर्नु छ
राँगा खसी – खसीनीको स्वाद हो दसैँ ।
कसैले आज कसैले भोलि मनाउँदा लाग्छ
जसरी खाए पनि हुने ननभेज सलाद हो दसैँ ।