गजल : हाँडी गाउँमा
ईश्वर प्रवासी
ओहायो, अमेरिका
कहीँ नभएको जात्रा, किन गर्यौ हाँडी गाउँमा
गाँस-बाँस उठाएर, बसाइँ सर्यौ हाँडी गाउँमा ।
पगरी गुथी घरमै बस्छौ, माखो मार्ने हुती छैन
वारी पारि बैरी पाली, जहर छर्यौ हाँडी गाउँमा ।
आखिर एक दिन मर्नै पर्छ, किन गर्छौ तेरो मेरो
कालो धन कुम्ल्याएर, तल झर्यौ हाँडी गाउँमा ।
पाप एक दिन कराउँछ, भन्ने गर्छन् बुढापाका
अख्तियारले समाउँदा, जिल्ल पर्यौ हाँडी गाउँमा
दायाँ बायाँ प्रहरी, पत्रकारको सवाल खर्रो
कालो निलो रङ्ग फेरी, झन्डै मर्यौ हाँडी गाउँमा ।