ए लासहरु

तुम्बेहाङ लिम्बू

ए लासहरू !
लास वरिपरि घुमिरहने झुटा आशहरु !
उठ ! उठ ! उठ ! अब बौरी उठ !
यति सजिलै तिमीहरू मर्न पाउन्नौ
यति कायरतापूर्वक तिमीहरू भाग्न पाउन्नौ
तिम्रा वीर पूर्वजको इतिहासमा कलङ्क बनेर
तिम्रा सन्ततिको भविष्य बर्बाद पारेर
म लासहरूसँग बोलिरहेछु
म लासहरूलाई आह्वान गरिरहेछु
उठ ! अब रक्तबीजको सन्तान बनेर उठ !
समयले तिम्रो चिहानको कफन उघारेको छ
परिस्थितिले तिम्रो पार्थिव शरीरमा अमृत छर्केको छ
ए लासहरू हो, उठ ! अब उठ !
वर्तमान परिस्थितिले तिम्रो पक्षमा
मोर्चा सम्हालेको छ !