फुकोसीमा
टीआर रेग्मी,खुदुनाबरी
फुकोसीमा,
हो तिमीलाई धेरै दुखेको छ
तर,
तिमी नकराऊ, नचिच्याऊ
गाली नगर, नउर्ल कसैसँग
जे हुनु थियो भइसक्यो ।
अब धेरै विकीरण नफाल वायुमण्डलमा
मानव सभ्यतालाई धेर त्रसित नपार ।
यतिखेर,
तिमी एकलो भने छैनौ दुनियाँमा
तिमीसँग लिविया,इराक, अफ्गानिस्तान
ओमन, बहराइन, भूटान आदि पनि
दुखिरहेका छन्
तानासाहको पञ्जाबाट उन्मुक्तिको लागि,
नारा घन्काउँदै, झण्डा फर्फराउँदै मानिसहरु उठिरहेका छन्
गोली,बारुद र बमको निसाना बनिरहेछन्
लासको पहाड उठेको छ,
त्यो भन्दा ठूलो त्रासको पहाड उठेको छ
स्वतन्त्रका नाममा, उन्मुक्तिका नाममा
भागा भाग र चित्कारहरु छन्
गोलीबारुद र मिसाइलहरुका हुङ्कारहरु छन्
युगौं अघिदेखिको आफ्नै भूमि छाडेर
मानिसहरु सीमाना पार भागिरहेछन् राता-रात
तर,
फुकोसीमा
क्षतविक्षत भए पनि
तिमीसँग आफ्नै प्यारो गाउँ छ
आफ्नै भूमि र स्वतन्त्र अस्तित्व छ,
हो म मान्छु-
तिम्रो पीडा अरुको भन्दा बढ्ता नै होला
भूकम्प र सुनामीको
त्रासदीका कथा कति छन् कति,
तर तिमीसँग प्रविधि र शिक्षा छ
चेतना र जाँगर छ,
हामी जस्तो जूनको प्रकाशमा
अभाव,गरिबी र पीडामा
आर्जेको शिक्षाको प्रमाणपत्र डस्विनमा हुत्याएर
दुनियाँको गुलाम गर्नु पर्दैन,
ढिलै भएपनि,
मण्डेला,गान्धि,मार्क्स र लेलिनका
अनुयायीहरु जन्मदै थिए,
वर्षौदेखिको निरंकुशता ढाल्न,
तानाशाहहरुको शाख झार्न
यद्यपि,
यी सब सपना पारिदियो कसैले…
नचाहँदा–नचाहँदै पनि हामीले
जूनको ज्योतिमा आर्जेको शिक्षा
दुनियाँको गुलाम गर्दै छ
मानवीय समस्याको समाधान र साहयताका नाममा
केवल एक पेट खानका लागि,
एक धरो कपडाका लागि,
अथवा सुख प्राप्तिको महत्वकांक्षाका लागि,
परन्तु,
फुकोसीमा-
तिमीसँग स्वभिमान छ, स्वतन्त्र अस्तित्व छ
म तिम्रो आणविक उर्जा संकट टार्ने
साहस र इच्छाशक्तिलाई सलाम ठोक्दछु,
अनि विपत्तिमा सहानुभूति प्रकट गर्दछु
तर,
फकोसीमा तिमीलाई
संसार विनाश गर्ने अधिकार छैन !
टी. आर. भाइ कबिता त गजबको लेखिएछ नि, जे होस् लेखनमा यात्रामा निरन्तरता दिनु होला. आगामी दिनहरुमा पनि बी .एल . भेट हुदैगरोस.
Though this poem has sympathised the earthquake,tsunami and nuclear radiation striken Japanese people yet it eloquently warns the world to save humanity from nuclear catastrophe.
Keep-up writing .