धर्ती फाटेको बिचित्र दृश्य

खगेन्द्र गौतम
क्यानाडा

अन्धकार रातमा धर्ती हल्लिएको आभास भयो
सिरिङ्ग भएको शरीर उठाउँदै,
सिरानीमा रहेको तिम्रो तस्बिर हेरें
कौतुहलताले मुटु जल्न थालेपछि,
आफ्नै देशको खबर पढेँ ।
अखबारका पानाहरूमा प्रकृति बौलाएर
धर्ती फाटेको बिचित्र दृश्य रैछ
चिच्याहट र कोहोलाहलको भिडबाट
तिम्रो आवाज सुनेको अनुभूत गर्दै थिएँ,
तर भग्नाशेषका पर्खालबाट तिम्रो लास पो झिकिँदै रैछ ।
के गर्ने प्रिये ! विवश छु म,
यो कोसौँ टाढाको मुग्लानमा बस्न
रहरका कोपिलाहरू त्यसै त्यसै ओइली गए,
युगल सपनाहरू आसुसँगै बगी गए ।
न त मिलन नै लामो भो, न त वियोग नै सरल !
तिम्रो अन्त्येष्टि मा केवल मेरा सम्झनाहरू मात्र
रहनेछन्,
कामना गर्छु!
तिमी मरे पनि हजार जुनी बाँचिरहनू ।
कामना गर्छु!
तिमी मरे पनि हजार जुनी बाँचिरहनु ।