पहिचान
चोकमान तुम्बापो
एक्रन,ओहायो
जहाँ
धनीहरुले गरीबहरुलाई मान्छे गन्दैनन्
गरीबहरुले
उनीहरुको गोडा नमोले
उनीहरुको चुलोमा आगो बल्दैन/मुखमा माड लाग्दैन
धनीहरुले जे गरे पनि
जे भने पनि
सहनु पर्छ गरीबहरुले
चुपचाप
निमुखाहरुको पक्षमा आवाज निकाल्नेले
कि त मारिनु पर्छ कि त सामना गर्नु पर्छ जेल नेलको
गरीबहरु सधैँ दबिएका हुन्छन् थिचिएका हुन्छन्
जहाँ
सधैँ हत्या, हिंसा अनि अपहरण भइरहन्छ
आफ्नै छोरीहरु
आफ्नै बाबुहरुबाट
र
आफ्नै आमाहरु
आफ्नै छोराहरुबाट बलत्कृत हुन्छन्
जहाँ
दिदी अनि बहिनीहरु
आफ्नै दाइ
अनि भाइहरुबाट सुरक्षित हुँदैनन्
हो
म त्यही देशको नागरिक
भन्न पनि लाज लाग्छ
तर भन्नै पर्छ आखिर
आफ्नो पहिचान किन लुकाउने ?
किन कि
यही नै त हो
हाम्रो असली पहिचान
१२ फेब्रुअरी २०१२