सृजना र हाम्रो साहित्यिक अभियान [सम्पादकीय]
सृजना एक विशिष्ट कार्य हो, त्यसैले जो कोही सृजनाको बाटो हिँड्न चाहँदैन र सक्दैन पनि । सृजना वैयाक्तिक प्रतिभाद्वारा प्रस्फुटित हुन्छ, दीर्धसाधनाद्वारा उज्यालिन्छ, खारिन्छ र विशिष्टतातर्फ परांमुख हुन्छ । यस्तो बाटो हिंड्नेहरु साँच्चो अर्थमा ईश्वर हुन् । सृर्जकको आफ्नै संसार हुन्छ, तर त्यो मानवीय संसार भन्दा भिन्न हुँदैन, मानवीय संवेदनाको आयाम र विस्तृतिभन्दा पर हुँदैन र धर्तीलाई नटेकी कन त्यो आलोकित हुन पनि सक्तैन । यस्तो विशिष्ट यात्रामा निस्किएका हाम्रा आदरणीय सर्जकहरुलाई Bhutaneseliterature.com आफ्नो चौथो वर्ष प्रवेश गरेको सुखद अवसरमा हार्दिक शुभेच्छा प्रकट गर्दछ ।
एउटा सानो समूहको लगान, चासो, उत्साह र समर्पणद्वारा स्थापना भएको Bhutaneseliterature.com ले तीनवर्षको अन्तरालमा झण्डै १२०० रचना आर्काइब (वेवसाइट–अभिलेखिकरण) गर्न पुगेछ । यो प्रकाशन, संकलन न्यून नै सही, यद्यपि हामीले भोग्नु परेका चुनौति, कठिनाइ र प्रतिघात सामु उभिएर हेर्दा यसलाई प्रगति र प्राप्ति नै मान्नु पर्छ । भूटानी समाजमा भाषा साहित्यप्रति जिज्ञासा राख्ने, खोज अनुसन्धान गर्ने, निरन्तर सृजनामा लागिरहने र दायित्वबोध गर्ने मानिसको अभाव हिजो पनि थियो र आज पनि छँदैछ । त्यसमा पनि यो विस्थापित भूटानीहरुका लागि संक्रमणकालीन समय हो । विकसित मुलुकहरुमा गएर स्थापित हुन र गरिखान कम चुनौतिपूर्ण कार्य होइन । जहाँ हिजोको भौगोलिक सामिप्यता, परम्परागत सम्बन्ध र त्यसभित्रको हार्दिकता, प्रेम र सद्भावना टुटेर मानिस स्वार्थप्रेरित भएको छ त्यहाँ साहित्यिक अभियान चलाउनु चानचुने कुरा होइन रहेछ । हामीले Bhutaneseliterature.com को स्थापना गर्नुको एउटा मुख्या उद्देश्य हो – वर्तमान पुस्ता रहेको भाषिक चेतना र ज्ञान नयाँ मुलुकहरुमा (नेपाली भाषाको शिक्षण नहुने भूटानीहरु पुनर्स्थापित भएका मुलुकहरु) हुर्किने भावी पुस्तासम्म पु-याउनु र मातृभाषाको सामान्य ज्ञान दिलाउनु । तर पुनर्स्थापित भूटानहरुमा यसतर्फ एकाध व्यक्तिहरुबाहेक खासै चासो गएको देखिँदैन । हिजो शरणार्थी शिविरहरुमा भाषिक, साहित्यिक, सांस्कृतिक अभियान चलाउनेहरु आज कुन कुनामा के प्रपञ्चमा लागिरहेछन् – कसैलाई थाहा छैन । भूटानी समाजका प्रबुद्ध व्यक्ति तथा चेतनाका संवाहक स्वयम् सर्जकहरुले पनि यस दिशातर्फ गंभीर भएर सोच्नु पर्ने दिन आएको छ ।
Bhutaneseliterature.com को स्थापनासंगै भूटानी साहित्यले साइवर युगमा प्रवेश ग-यो । हुन त एक हिसावले विस्थापित भूटानी समाज नै साइबर–समाज बन्न पुगेको छ । सबै आदन–प्रदानहरु साइबर मार्फत् हुन्छन्–फेसबुक होस् कि याहु । भौगोलिक दूरता भए पनि वैचारिक, सिर्जनात्मक र भावनात्मक सामीप्यता कायम गर्न हामीलाई कठिन रहेन अब । चुनौतिहरु छन्, तर सम्भावनाहरु त्योभन्दा बढी छन्, मात्र खोजी गर्नु परेको छ । हामी यो साहित्यिक अभियानमा लेखकहरु खोज्ने, उनीहरुलाई सृजना पस्किने मञ्च प्रदान गर्ने र उनीहरुको सृजनको मूल्याङ्कन गर्ने दिशामा हाम्रा प्रयत्नहरु परिलक्षित गरिरहने छौं र सबै लेखक, पाठक र शुभेच्क्षुकहरुको माया र सद्भाव पाइरहेने आशा पनि राख्छौँ । अस्तु !