प्रतिक्षाको घडी हेरिरहेको छु
केशव काफ्ले, पेन्सिलभेनीया
मधुरो बत्तीका कारण कोठाका सामानहरुको मधुरो छायाँ मस्त निन्द्रामा सुतिरहेकोझैँ देखिन्थ्यो | सुनसान मध्यरातको मस्त निन्द्रामा मोवाइलको घन्टी बज्यो | आँखा मिच्दै भितामा आड्याइएको घडीमा आँखा पुर्याएँ | घडीले रातको एक बजेको जानकारी गराइरहेको थियो | फोनको घन्टी निरन्तर बजिरहेको थियो | यस्तो मध्यरातमा को, किन फोन गर्छ
….? , मनमनै बर्बराउँदै मोवाइल उठाएँ | “हेल्लो !” “म तपाईँको प्रतिक्षामा छु ” | एक अधवैँशे केटीको स्वर मेरो कानमा गुन्जियो | “को बोलेको ?” मैँले झस्केर प्रश्न गरेता पनि मलिन स्वरमा उनले भनिन्, “म दोरोखाबाट प्रतिक्षा बोलेको ,म अहिले राजधानीमा छु ।” र थपिन्, “म एक कलाकार पनि हुँ | ममा सुतेका मानिसलाई उठाउने सक्ने स्वर छ | मलाई आज तपाईँलाई एउटा गीत सुनाउन मन लाग्यो र कल गरेको” | मध्यरातमा पागलले जस्तै कुरा गर्ने कुन चैँ केटी हो ? मनमा रिस उठेता पनि मलिन स्वरमा प्रश्न गरेँ | “मेरो नम्बर तपाईँले कहाँबाट पाउनु भयो नि ?” उसको सजिलो उत्तर थियो “मैँले हेजो लक्की नम्बर छानेको” | “तर मलाई यो सब झुटो लागेको छ”, मैँले भनेँ | ऊ भन्दै थिई “तपाईँलाई थाहा छ हाम्रो देशमा यो जर्जर परिस्थितीको सिर्जना कसरी भयो ? महासुर, मन क्षेत्री ,छिरिंग , डेमा आदीको कसरी निर्मंमतापूर्वक हत्या गरियो ? सार्चोप दाजुभाइहरुको ऐतिहासिक पुस्तक ‘ल्होहीछेद्ज़ों’ आज कहाँ, कसले, किन बन्दी बनाएको छ ? यो सबको उत्तर मेरो गीतमा छ | आज तपाईँलाई सुनाउँदै छु |” ऊ भन्दै थिई । ” तपईलाई डर लाग्यो ? नडरउनुहोस् | मेरो गीतमा जर्जर तानाशाहलाई पल्टाउने शक्ति छ | मरो गीतमा स्वतन्त्रको आभाश छ | सुनाउँ?” ममा के भनौँ शब्द नै आउन गाह्रो भयो …म अक्मकाएँ | “अमम …!…!!” हिजो छिमेकी धनेलाई तानाशाही सरकारका सैनीकले बर्बर दमन गरेको , पारी समिटार गंगेले देशमा निरंकुशताको विरुद्ध सैनिकबाट नै फरार भई स्वतन्त्रको झन्डा उठाउँदा कुटपिट गरी झेलमा राखी निर्ममतापूर्वक हत्या गरेको र उसका बुबालाई पनि रुखमा फाँसी दिएर हत्या गरेको स्मरण भयो मलाई | तर पनि प्रतिक्षाको गीतका शब्दहरु र स्वर सुन्न मन पर्यो र सुनाउ न त के भनेको मात्र थिएँ मोवाइलको बेट्री नै सकिएर स्विच अफ भयो | बिचरीले कति खोजमेल गरी रचना गरेकी स्वतन्त्रको गीत सुन्न पाइएन …. कहिले स्वतन्त्रतापूर्वक मध्यरातमा नै नकुरीकन प्रतिक्षाको दिउसै खुल्लेआम मंचबाट सुन्न पाउने हो, प्रतिक्षाको घडी हेरिरहेको छु |