सम्झनामा शिविर
माया भट्टराई
अमेरिका
शरणार्थी शिविरमा
हुँदा,बिताएका ती
क्षणहरू सम्झनामा
कैद छन् अझै..
बर्खायाममा भेल बाढी
आउँदा छेउछाउका
कुलेसा,भङ्गाला बढेर
घरभित्रै पानीको आहाल
जम्थ्यो ..
स्कुल पढ्दा हेड सर/हेडगुरूआमाको
आँखा छल्दै पायन्ट/स्कट बाहिर
सर्ट लाएर ठाँटिदै स्कुल गएको,
,,,स्कुल पढ्दा क्लासबाट
भागेर दमक वा मधुमल्ला
फिल्म हेर्न गएको..
….
ऊन कात्दा र
ढाका टोपीको तान
बुन्दा शनिवार
एक घरमा जम्मा भएर
रेडियोको कार्यक्रम
साथीसँग मनका कुरा
सुन्दाको त्यो क्षण ..
….
शिविरमा बस्दा-बस्दा
निसास्सिएर शरणार्थीहरू
शिविरबाटै आफ्नै देश
भुटानै फर्की जान्छौँ भनेर
धेरैचोटी प्रयास गरेको अनि
हाम्रा पटक-पटकका प्रयास
विफल भएका..
….
चैत मासमा हावाहुरी
चल्दा,घरको छानो
उडाउँछ भनी रातभरि
घरको धुरी र बलो समातेर
रात बिताएको त्यो
पल,सम्झिरहेकी छु
अझै।